Կանաչ Ուսուցման կենտրոնը հիմնադրվել է 2015 թվականին: Այն կայուն տնտեսության եզակի մոդել է, որը ֆերմերներին, ուսանողներին, մասնագետներին, հետազոտողներին և առհասարակ գյուղատնտեսությամբ հետաքրքրվողներին առաջարկում է կրթական և խորհրդատվական ծառայություններ, փորձի փոխանակման լայն հնարարավորություններ։
Մեր առաքելությունն է օգնել գյուղատնտեսության ոլորտում ներգրավված անհատներին և կազմակերպություններին բարելավելու և կայունացնելու գյուղմթերքի արտադրությունը, կանաչ տեխնոլոգիաների և բնապահպանական գաղափարների ներդրումն ու տարածումը, տուրիստական պոտենցիալի բացահայտումն ու օգտագործումը, համայնքային համաչափ զարգացումը, կանանց ու երիտասարդների տնտեսական հզորացումը: Սեփական օրինակով ցույց տալ հանրային և բիզնես ոլորտներում կանաչ տեխնոլոգիաների կիրառման արդյունավետությունը։ Կանաչ ուսումնական կենտրոնում կազմակերպվում է Հայաստանում գյուղական կյանքի և ավանդույթների ամենամեծ բերքի փառատոնը։
Վերապատրաստումների միջոցով մենք տրամադրում ենք տեսական և գործնական գիտելիքներ՝ մեր շահառուներին և գործընկերներին տալով անհրաժեշտ գործիքներ օրգանական մշակաբույսերի արդյունավետ աճեցման, վերամշակման և իրացման վերաբերյալ։ Կենտրոնն ամբողջովին կահավորված և ապահովված է անհրաժեշտ սարքավորումներով դասընթացի մասնակիցներին հյուրընկալելու համար, որի ընթացքում նրանք ձեռք են բերում օրգանական, կայուն և խելամիտ գյուղատնտեսությանն առնչվող հմտություններ, գիտելիք ու կարողություններ։
Գործնական վերապատրաստումների և փորձառական ցուցադրությունների անցկացման տարածքը կազմում է շուրջ 1,5 հա։ Այն ներառում է պտղատու այգի, տասնյակ առանձին վերամբարձ բանջարանոցներ, լիմոնարիում և փոքրիկ ծածկապատ բակ։ Ցուցադրության նպատակներով աճեցվում են հարյուր տեսակից ավել մշակաբույսեր՝ հաշվի առնելով կլիմայական պայմանները և մշակաբույսերի պահանջը հողի նկատմամբ։ Կանաչ կենտրոնում աճեցվում են ավանդական և ոչ ավանդական մշակաբույսեր՝ մրգատու ծառեր, բանջարեղեն, հատապտուղներ, կանաչեղեն, դեղաբույսեր և դեկորատիվ բույսեր: Տեղադրված է ոռոգման կաթիլային համակարգ, ինչպես նաև հակակարկտային ցանց և այլ միջոցներ, որոնք էլ ավելի են բարձրացնում ԿԱՆԱՉ տնտեսության արդյունավետությունը։
Կիրառվում են խառը ցանքի, մշակաբույսերի հերթափոխման, ցանքածածկի և ֆերմերներին դեռևս անծանոթ նոր կլիմակայուն և այլ արդյունավետ տեխնոլոգիաներ։ Բույսերի վնասատուների և հիվանդությունների դեմ պայքարի համար օգտագործվում են միայն անվտանգ ու ոչ թունավոր միջոցներ։ Հողը պարարտացվում է միայն օրգանական պարարտանյութերով, որոնք հիմնականում պատրաստվում են տեղում։ Ստեղծվել են պարարտախառնուրդի (կոմպոստ) և կենսահումուսի արտադրման տարածքներ, որտեղ վերամշակվում են գյուղատնտեսական ու տնտեսության թափոնները։
Գործում է արդյունավետ էներգահամակարգ՝ 40 կվտ հզորությամբ, որը համալրված է արևային ջրատաքացուցիչներով՝ մշտական տաք ջուր ապահովելու համար, ֆոտովոլտային վահանակներով՝ էլեկտրաէներգիայի սպառմանը աջակցելու համար և արևային չորանոցով՝ տեղում աճեցված տարատեսակ մրգերը և կանաչեղենը, թեյաբույսերն ու դեղաբույսերը չորացնելու և երկարաժամկետ պահպանության դնելու համար։
Ուսուցման կանաչ կենտրոնը գտնվում է Երևանից (Աբովյան պուրակից) մոտ 12 կմ հեռավորության վրա՝ Կոտայքի մարզի Ձորաղբյուր համայնքի տարածքում։ Երևանից գտնվում է 10 կմ հեռավորության վրա։
Կենտրոնի տարածքում տեղակայված երկհարկանի շենքի մակերեսը 320 մ² է և ունի 8 ննջասենյակ, որտեղ միաժամանակ կարող է գիշերել 16 մարդ (ուսուցանվող ֆերմերներ և/կամ ուսանողներ)։ Տարածքում կան նաև այլ փայտե շինություններ, որտեղ ևս կարող է գիշերել 10 մարդ։
Շենքը հարմարավետ է, հագեցած է ժամանակակից կահավորանքով՝ ներառյալ լոգարանները և խոհանոցը, որտեղ ամեն օր տեղում աճեցված բանջարեղենից թարմ և առողջարար ուտեստներ են պատրաստվում։ Շենքի առաջին հարկն օգտագործվում է նաև գյուղատնտեսական, բնապահպանական և հարակից բնագավառներին առնչվող այլ թեմաներով ներկայացումների ու աշխատաժողովների համար։
Ուսուցման կանաչ կենտրոնի Լիմոնարիումը, որը միաժամանակ միջոցառումների անցկացման վայր է, նախատեսված է նաև վարձակալության համար։ Եթե ցանկանում եք խորհրդաժողով, աշխատաժողով, արտագնա նիստ, տոնակատարություն կամ այլ միջոցառում կազմակերպել, ապա Լիմոնարիումի սրահը կարող է ընդունել 80 մարդ։ Հարակից՝ մոտ մեկ հա տարածքի վրա գտնվող շքեղ փայտյա տնակներով տարածքը, հարմարավետ վայր է փառատոնների կազմակերպման համար։ Մենք ունենք տարբեր փաթեթներ՝ ներառյալ ուտելիքի և ըմպելիքի մատուցումը։
Կանաչ ուսուցման կենտրոնում է կազմակերպվում ՀՀ ամենամեծ գյուղական կյանքի և ավանդույթների փառատոնը՝ Բերքի տոնը։
Բանակի 18, Ձորաղբյուր, Կոտայքի մարզ, Հայաստան
2021թ-ին Ուսուցման Կանաչ կենտրոնը Տավուշի մարզի, Դիլիջան խոշորացված համայնքում հիմնադրեց իր առաջին մասնաճյուղը։ Կենտրոնը խելամիտ գյուղատնտեսության եզակի մոդել է, որն առաջարկում է գյուղատնտեսության, բնապահպանության և տուրիզմի ոլորտում կրթական, խորհրդատվական, փորձի փոխանակման, միջոցառումների կազմակերպման և այլ ծառայություններ՝ ոլորտով հետաքրքված անհատներին և կազմակերպություններին։
Կենտրոնի տարածքը բաղկացած է դասընթացների ու հյուրընկալության համար շինություններից, գիշերակացի համար նախատեսված փայտե տնակներից ու նորագույն տեխնոլոգիաներով հագեցած փորձա-ցուցադրական տնտեսությունից։
Գործունեության այս կարճ ժամանակաշրջանում կանանց, երիտասարդների, ֆերմերային խմբերի, տարբեր ՀԿ-ի անդամների և ծրագրերի շահառուների համար իրականացվել են բազմաթիվ դասընթացներ կայուն գյուղատնտեսության, ագրոտուրիզմի սոցիալական ձեռներեցության, ջերմոցային տնտեսության վերաբերյալ, ներառյալ շրջայցեր, փառատոններ ու փորձի փոխանակումներ:
Կենտրոնը շինությանը կից ունի նորագույն տեխնոլոգիաներով հագեցած օրգանական տնտեսություն, որտեղ աճեցվում են 150-ից ավել բանջարեղենի, կանաչեղենի, ոչ ավանդական մշակաբույսերի, տարբեր պտղատուների սորտեր: Այցելուները այցի ժամանակ կարող են ծանոթանալ հակակարկտային ցանցի, կաթիլային ոռոգման, անձրևացման, կոմպոստացման և այլ մեթոդների առավելություններին, կիրառությանը։ Բացի այդ կենտրոնում արտադրվում ու վաճառվում են աճեցված բույսերի, տարածաշրջանում հայտնի վայրի հավաքի բույսերի սերմերը, որի նպատակը նոր տեսակների տարածումն է ու սննդի մեջ կիրառությունը։
Կենտրոնի հեռավորությունը Երևանից՝ 120կմ, Դիլիջանից 22կմ, Իջևանից 10կմ, Վանաձորից 58կմ, Գյումրիից 120կմ է։ Կենտրոնի տարածքում միաժամանակ կարող է գիշերել 19 մարդ, որից 3 սենյակը ընտանեկան է /երեք անձի համար/, իսկ 10 հոգին կարող են գիշերել տարածքում գտնվող 5 փայտե հեքիաթային տնակներում։
Շենքը հարմարավետ է, հագեցած է ժամանակակից կահավորանքով՝ ներառյալ լոգարանը և խոհանոցը, որտեղ ամեն օր տեղում աճեցված օրգանական և ոչ ավանդական բանջարեղենից պատրաստվում են ուտեստներ։ Շենքի առաջին հարկը և տնակներին կից փայտյա շինությունը ծառայում է ուսուցումների, քննարկումների, աշխատաժողովների և կորպորատիվ միջոցառումների համար։
Կենտրոնը, որը միաժամանակ թեմատիկ միջոցառումների անցկացման վայր է, նախատեսված է նաև վարձակալության համար։ Եթե ցանկանում եք Ձեր խորհրդաժողովը, աշխատաժողովը, արտագնա նիստը, թիմի ժողովը կամ այլ միջոցառում կազմակերպել բնության մոտ խաղաղ միջավայրում, ապա կենտրոնի դասընթացի սենյակը լավագույն տարբերակն է։ Կենտրոնում է կազմակերպվում ամենամայա դդմի տոնը: EVENT PAGE.
Հովք, Տավուշ, Հայաստան
